समाज

नेपालबाट भारततर्फ लैजाँदै गरेको अवैध ४७ गाई–गोरु प्रहरी नियन्त्रणमा 

• गाउँ सहर डेस्क
• २२ मङ्सिर सोमबार, २०७७ | १२:३७:०० मा प्रकाशित

मोरङ – प्रहरीले अवैध रुपमा नेपालबाट भारत लैजाँदै गरेका ४७ गाई–गोरु नियन्त्रणमा लिएको छ । मोरङको धनपालथान गाउँपालिकामा भारततर्फ अवैध रुपमा लैजाँदै गरेको अवस्थामा उक्त संख्यामा गाई–गोरु प्रहरीले नियन्त्रणमा लिएको हो ।

सोमबार बिहान करिब साढे १ बजे गाउँपालिका–१, गडेरिया चौकबाट नियन्त्रणमा जिल्ला प्रहरी कार्यालय मोरङले जनाएको छ । 

मोरङ प्रहरीका प्रवक्ता एवं प्रहरी नायब निरीक्षक मानबहादुर राईका अनुसार भेटनरी क्वारेन्टिनबाट अनुमति तथा सिफारिस नगरिएका २९ वटा गाई, १५ गोरु, एक बाच्छी र दुई बाच्छा गरी ४७ गाई–गोरु प्रहरीले नियन्त्रणमा लिएको हो। राईका अनुसार करिब ५ लाख २१ हजार रुपैयाँ बराबरको गाई–गोरु भारततर्फ लैजाने क्रममा प्रहरीले नियन्त्रणमा लिएको हो।

प्रहरीले नियन्त्रणमा लिएका गाई–गोरु विराटनगर रानीस्थित भन्सार कार्यालयलाई बुझाउने जनाएको छ । प्रहरीले गाई–गोरुको मालिक वा अवैध रुपमा भारत लैजाने व्यक्तिबारे कुनै जानकारी दिएको छैन ।