स्वास्थ्य

कोरोनाभाइरसबाट २५९ काे मृत्युः विश्वव्यापी स्वास्थ्य आपतकालकाे घोषणा, २१ देश प्रभावित

काठमाडाैँ । काेराेनाभाइरसबाट अहिलेसम्म मृत्यु हुनेकाे संख्या २५९ पुगेकाे छ । 

महामारी रूप लिएसँगै विश्व स्वास्थ्य संगठन (डब्लुएचओ) ले बिहीबार कोरोनाभाइरसको महामारीलाई विश्वव्यापी स्वास्थ्य आपतकाल घोषणा गरेको छ ।

मात्र एक हप्ताको अन्तरमा कोरोनाभाइरसबाट संक्रमितको सङ्ख्या १० गुणा वृद्धि भएपछि डब्लुएचओले यो घोषणा गरेको हो ।

यस भाइरसको संक्रमणबाट शुक्रबार बिहानसम्ममा चिनियाँ स्वास्थ्य आयोगले यस रोगबाट संक्रमित हुनेको सङ्ख्या ११ हजार ७ सय ९१ पुगिसकेको बताएको छ । थप १ लाख २ हजार मानिसहरुमा यस रोगको परीक्षण भइरहेको छ । पछिल्लाे २४ घण्टामा काेराेनाभाइरसकाे २१०० नयाँ मामला आएका छन् ।

संयुक्त राष्ट्रको स्वास्थ्य एजेन्सीले अन्तर्राष्ट्रिय अपातकाललाई ‘असाधारण घटना’ भनेर परिभाषित गरेको छ जसमा अन्य देशलाई पनि जोखिम रहेको र सङ्गठित अन्तर्राष्ट्रिय प्रतिक्रयाको आवश्यकता रहेको उल्लेख गरिएको छ ।

‘चीनमा जे भइरहेको छ त्यही कारणले मात्र यो घोषणा गरिएको होइन,’ डब्लुएचओका प्रमुख टेड्रोस अधानोम घेब्रेइससले भने, ‘अन्य देशमा के भइरहेको त्यसको लागि हो ।’ उनले कमजोर स्वास्थ्य प्रणाली भएको देशमा यो भाइरस फैलन सक्नेमा चिन्ता व्यक्त गरे ।

डब्लुएचओले अन्य १८ देशमा ९८ जनामा यो भाइरसको संक्रमण देखापरेको बताएको छ । यसमा धेरै जसो संक्रमित चिनियाँ सहर वुहानबाट यात्रा गरेको पाइएको छ । जर्मनी, जापान, भियतनाम र अमेरिकाका ८ जना बिरामीमा भने मानिसबाट मानिसमा सरेको पाइएको छ ।

डब्लुएचओका प्रमुखले कोरोनाभाइरसको संक्रमण रोक्नका लागि चिनियाँ सरकारले अपनाएको उपायहरुको पनि प्रशंसा गरेका छन् ।

डब्लुएचओले यसअघि पाँच पटक यस्तो आपतकालको घोषणा गरेको थियो । सन् २००९ मा स्वाइन फ्लु, सन् २०१४ मा पोलियो, सन् २०१६ मा जिका र सन् २०१४ र १९ मा इबोला भाइरसको महामारी फैलिँदा यस्तो घोषणा गरिएको थियो ।

डब्ल्यूएचओका अनुसार, भारत समेत २१ देशमा काेराेनाभाइरसकाे संक्रमणका १०० मामला देखिएका छन् । यसमा चीन, हङ्कङ्ग, दक्षिण कोरिया, अमेरिका, फ्रान्स, जर्मनी, भारत, श्रीलंका, नेपाल, थाइल्याण्ड, मलेशिया, कम्बाेडिया, जापान, अस्ट्रेलिया, सिंगापुर, ताइवान, मकाऊ, भियतनाम, यूएई, रूस और ब्रिटेन छन् । 

भर्खरै प्राप्त समाचार अनुसार चीनकाे वुहानबाट ३२४ भारतीयलाई नयाँ दिल्ली पुर्याइएकाे छ । तर, नेपालले भने कुनै निर्णय गरिनसकेकाे परराष्ट्र मन्त्री प्रदिप ज्ञवालीले बताएका छन् । उनले भनेका छन्- जुनसुकै बेला निर्णय हुन सक्छ । एजेन्सीकाे सहयाेगमा

गाउँ सहर डेस्क

तपाईँको मत