गाउँ सहर
तस्बिर : रासस
देशको विकासमा कायापलट गर्ने अभियानमा सरकार : प्रधानमन्त्री ओली
- २ भदौ शनिबार, २०७५ | १९:५४:०० मा प्रकाशित
लहान । प्रधानमन्त्री केपी शर्मा ओलीले देश विकासको कायापलट गर्ने महान अभियानमा सरकार जुटेको बताएका छन्।
धनुषाको गणेशमान चारनाथ नगरपालिका–९ बरमझियामा आज आयोजित शहीद रामवृक्ष यादवको २४औँ स्मृतिसभालाई सम्बोधन गर्दै प्रधानमन्त्री ओलीले भने, “गरिबी, बेरोजगारी अन्त्य गरी मुलुकको कायापलट गर्ने योजनाका साथ सरकार अघि बढेको छ, पाँच वर्षभित्र मुलुकको स्वरुप फेरिनेछ ।” उनले सङ्घर्ष होइन, मुलुकको गरिबी हटाउन र समृद्धिमा जुट्न सबैसँग आग्रहसमेत गरे ।
व्यावहारिकरुपमा मुलुकको गरिबी हटाउन सरकार दृढताका साथ अघि बढेको उल्लेख गर्दै प्रधानमन्त्री ओलीले आफ्नो कार्यकालमा प्रदेश नं २ मा समृद्धिका हरेक उपायलाई अवलम्बन गरिने बताए।
उनले प्रदेश नं २ मा निजगढ अन्तर्राष्ट्रिय विमानस्थल निर्माण, पूर्व–पश्चिम रेल्वे, काठमाडौँ तराई दु्रतमार्ग निर्माण, औद्योगिकग्राम स्थापना, धार्मिकस्थलको संरक्षण र विकास, मेडिकल कलेज र विश्वविद्यालयको स्थापना, सिँचाइका पूर्वाधारको विकास, कलकारखानाको स्थापनालगायतका विकास निर्माणका योजना विस्तारको गृहकार्य अगाडि बढाइएको जानकारीसमेत दिए।
प्रधानमन्त्री ओलीले युवालाई वैदेशिक रोजगारीमा जान रोक्नका लागि आवश्यक रोजगारीका अवसर सिर्जना गरिने बताउँदै प्रदेश नं २ अन्य प्रदेशको तुलनामा सम्भावना बोकेको प्रदेश भएको हुँदा परिवर्तन ल्याउनका लागि अब बिलम्व गर्न नहुने बताए ।
उनले प्रदेश नं २ ले कुल जिडिपीको १६.२ प्रतिशत योगदानमात्र पुर्याइरहेकामा यो प्रतिशत बढाउन सिँचाइ र कृषिको आधुनिकीकरण गरिने बताए । उनले तराई–मधेश भएर बग्ने ठूलठूला नदी जस्तै कोशी–कमला डाइभर्सनलगायतका सिँचाइका आयोजना कार्यान्वयनतर्फ अग्रसर हुन आवश्यक रहेको उल्लेख गरे ।
प्रधानमन्त्री ओलीले भने, “मधेशको उर्वरभूमिको सही सदुपयोग गर्न सक्नुपर्दछ, सहकारिताका माध्यमबाट यहाँ उत्पादन हुने अन्न तथा फलफूल विदेश निर्यात गर्न सकिए छिट्टै समृद्ध हुन्छ ।” कोशी नदीमा पानीजहाज चलाएर कलकताबाट समान ल्याउने सरकारको योजना रहेको उल्लेख गर्दै उनले नेपालको झण्डा फरफराएर हिँडेको पानीजहाज समुद्रमा कुदेको नेपाली जनताले देख्ने बताए ।
प्रधानमन्त्री ओलीले भने, “जनताले नेतृत्वका लागि जनमत दिएर आफूहरुलाई पठाएको हो, अब हाम्रो मुख्य काम भनेकै जनताको सेवा गर्नु हो, त्यसप्रति हामी प्रतिबद्ध छौँ ।” कुनै नेपाली जनता खानाविना र अपहेलित भएर बाँच्नु नपर्ने दाबी गर्दै प्रधानमन्त्री ओलीले जनताले देखेको समृद्धिको सपना वर्तमान सरकारले पूरा गर्ने प्रतिबद्धतासमेत व्यक्त गरे ।
सुनकोशी र कमला नदीलाई डाइभर्सन गरी तराईको खेतीयोग्य जमीनमा सिँचाइ गर्ने र नपुगेका ठाउँमा सोलरपावरबाट सिँचाइ गरी उन्नत तरिकाले कृषि उत्पादन गर्ने सरकारको योजना रहेको उल्लेख गर्दै प्रधानमन्त्री ओलीले अबको दिनमा यो खण्डेखेती प्रणालीलाई विस्थापन गरी सहकारीको माध्यमबाट योजनाबद्ध खेती गरी उत्पादनमा वृद्धि गर्ने योजना सरकारले बनाएको बताए ।RSS
प्राप्त प्रतिक्रिया
तपाईँको मत
प्रतिकृया दिनुहोस